2018 йил 15 август соат 10:00да «JV MAN Auto-Uzbekistan» МЧЖ ҚК сервис ва дилерлик марказида (Самарқанд вилояти, Жомбой ш.) “Юк автомобиллари, автобуслар, осма ва тиркама техника бутловчи деталларини маҳаллийлаштириш бўйича маҳаллий ишлаб чиқарувчилар билан кооперация” кўргазмаси очилади.
Ушбу кўргазма маҳаллий автоқисмлар ишлаб чиқарувчилар, шунингдек автомобиль саноатида ўз бизнесини ривожлантириш истагида бўлган тадбиркорлар билан ўзаро манфаатли кооперация алоқаларини кенгайтириш йўли орқали «JV MAN Auto-Uzbekistan» МЧЖ ҚК ва «UzAutoTrailer» МЧЖда ишлаб чиқариладиган маҳсулот маҳаллийлаштирилиши даражасини ошириш ва таннархини пасайтириш мақсадларида амалга оширилмоқда.
Кўргазмада юк автомобиллари, автобуслар, осма ва тиркама техниканинг маҳаллий ишлаб чиқарувчиларга ўзлаштириш таклиф этилаётган жами 500 дан зиёд бутловчи деталлари ва боғламалари тақдим этилади. «JV MAN Auto-Uzbekistan» МЧЖ ҚК ва «UzAutoTrailer» МЧЖ масъул мутахассислари ташриф буюрувчиларнинг автоқисмлар маҳаллийлаштирилишига оид саволларига батафсил жавоб беради.
Кўргазма октябрь охирига қадар давом этади. Иш вақти: ҳар куни 9:00дан 17:00 гача (якшанба ва расмий байрам кунларидан ташқари).